Nan eta Florid, Etazini, Pierre Jean Raymond André kise Direktè Jeneral OAVCT (Ofis Asirans Veyikil Kontre Tyè), depoze yon plent pou difamasyon ak demann enjiksyon kont veteran lame amerikèn lan Rod Joseph nan Tribinal Federal Distri Sid Florid la, lendi 8 septanm 2025 lan. Plent sa depoze atravè kabinè avoka Morris Legal, LLC kote prezime vitkim lan mande plis pase 50 milyon dola kòm domaj moral, reparasyon ak sanksyon pinitif.
Daprè dokiman legal yo, Rod Joseph ta mennen ant jiyè ak out 2025, yon kanpay sou entènèt kote li te fè fo akizasyon kont mesye André. Akizasyon sa yo gen rapò ak koripsyon ak lyen li ta devlope ak òganizasyon kriminèl an Ayiti yo san okenn prèv. Akizasyon sa yo lakoz gwo domaj sou repitasyon ak byennèt Direktè a.
Nan plent sa prezime vitkim lan mande tou pou tribinal la rann yon òdonans pou mande mesye Rod Joseph retire tout kontni difamatwa ki deja pibliye, epi entèdi tout lòt piblikasyon ki ka kontinye sal imaj li. Lajistis amerikèn pral gen pou evalye si toutbon aksyon Rod Joseph yo depase limit libète ekspresyon an jouk pou yo ta rive nan atak pèsonèl ki merite sanksyon.
Daprè avoka Mesye André a, J. Wil Morris, dosye sa a mete aksan sou nesesite pou gen plis responsabilite nan epòk dijital la, kote mo nan repete yo sou rezo sosyal yo ka gen konsekans grav sou lavi ak repitasyon lòt moun. Avoka a souliye tou sa se yon egzanp klè sou jan otorite piblik yo ak tout lòt sitwayen ka defann entegrite yo kont fo nouvèl, difamasyon ak manipilasyon medyatik.
Akizasyon sa yo vini nan moman kote OAVCT, ki se youn nan enstitisyon Leta ki jere sekirite ak asirans veyikil sou teritwa ayisyen an, te deja nan gwo lit pou amelyore imaj li. Daprè André, atak pèsonèl sa yo riske mete an danje efò transparans ki t ap fèt yo, epi li estime lajistis se sèl mwayen ki ka pémèt gen limit ki mete.
Daprè enfòmasyon ofisyèl k ap sikile nan plizyè jounal an Ayiti tankou lòtbo dlo, dosye sa deja pran chemen legal yo e li ka kreye yon presedan enpòtan sou koze difamasyon dijital yo sitou lè yo konsène otorite piblik. Koulyea tout je rete fikse ap tann repons Rod Joseph ak kijan li pral tabli plan batay li legalman.
