Malgre gwo lapli ki tap tonbe sou sant vil Pòtoprens jodi samedi 06 septanm 2025 lan, sa pa t anpeche fòs de lòd yo lanse yon operasyon byen miskle kont gang Viv Ansanm yo nan kè kapital la. Gwo echanj kout bal te eklate ant Polis Nasyonal d Ayiti (PNH) ak bandi yo ki kontinye simen laperèz sou popilasyon an. Sak pase jodia fè santi lespwa pa fin pèdi pou sekirite a retounen.
Nan mitan operasyon sa, fòs de lòd yo mete an aplikasyon taktik ki pi inovan kote yo lage 3 dròn kamikaz sou gang yo. Se pa premye fwa yo itilize zouti teknolojik sa a sou teren an kont bandi ame nan peyi a.
Daprè enfòmasyon preliminè, plizyè bandi ta pèdi lavi yo pandan echanj kout bal sa yo ak fòs de lòd yo. Se yon aksyon rapid ak presi ki ta pral redwi kapasite operasyonèl gang yo nan sant vil la. Itilizasyon regilye dròn kamikaz yo montre PNH la ap chèche adapte l ak reyalite konba modèn yo, kote gang yo vin pi gen plis gwo zam lou ak gwo mwayen finansye.
Pou kounye a, sitiyasyon an toujou sou tansyon nan sant vil Pòtoprens lan kote operasyon an te fèt la. Men popilasyon an, ki bouke k ap kouri kite kay yo ak viv nan gwo laperèz chak jou, wè nan operasyon sa yon siyal lespwa. Li rete pou nou wè si operasyon sa yo ap rapouswiv ak siksè nan lòt fwaye gang yo atravè kapital la.
